Татарстан роботлаштыру тыгызлыгы буенча Россиядә алтынчы урында тора
Яр Чаллы ИТ-паркында «Сәнәгатьне цифрлаштыру» еллык конференциясе белән беррәттән 15 нче ведомствоара эш төркеме утырышы узды.
Киңәшмәдә Дәүләт Думасы депутаты Айдар Метшин һәм Татарстанның цифрлы үсеш министры Илья Начвин катнашты. Катнашучылар сәнәгый роботлаштыруны үстерү һәм үзебезнең ил карарларына күчкәндә, предприятиеләр очраша торган төп кыенлыклар турында фикер алыштылар.
Татарстан роботлаштыру дәрәҗәсе буенча Россиядә бишенче һәм роботлаштыру тыгызлыгы буенча алтынчы урында тора. Хәзер республикада һәр 100 мең хезмәткәргә 50 робот туры килә. 2030 елга бу күрсәткечне өч тапкырга диярлек арттырырга планлаштыралар - 145 роботка кадәр.
Татарстанның иң эре компанияләре цифрлаштыру тәҗрибәсе белән уртаклаштылар:
- КАМАЗ: үсеш буенча директоры Эльдар Шәвәлиев җитештерүдә ЯФ-технологияләрен куллану турында сөйләде. Предприятие автоматик трассировканың интеллектуаль системасын һәм документацияне тикшерә торган «ЯФ норма күзәтчелеге» агентын гамәлгә кертә.
- РУ-ДРАЙВ: компаниягә нигез салучы Равил Идиятулин илебезнең тулы инженерлык циклындагы сәнәгать чишелешләрен булдыру тәҗрибәсе белән уртаклашты.
- Татнефть: ЯФ компетенцияләр үзәге җитәкчесе Константин Кучукбаев Компьютер күзе нигезендә ЯФ-чишелешләре һәм технологияләрен гамәлгә кертү тәҗрибәсен тәкъдим итте.
- Марс-технологияләр: федераль проектларны үстерү департаменты директоры Радик Гыйсмәтов предприятиеләрнең югары нәтиҗәләргә ирешү өчен нинди критерийлар буенча ИТ-чишелешләр сайлый алуын аңлатты.
Татарстанда цифрлаштыру өлкәсендә 631 проект гамәлгә ашырыла. Мәсәлән, «Сетевая компания» "Электр челтәрләренең цифрлы игезәген" булдырган. Бу карар энергия объектларының параметрларын фаразларга, ремонтларны планлаштырырга, персоналны виртуаль симуляторларда өйрәтергә мөмкинлек бирә. Шулай ук республикада үз роботларын җитештерү дә үсә: Иннополиста сәнәгать робототехникасын үстерү үзәге булдырылды, ә «Эйдос Робототехника» компаниясе коллаборатив һәм сәнәгать роботлары линейкасын үстерә.
15 нче эш төркем ецифрлаштыру һәм «Мәгълүматлар икътисады» илкүләм проекты мәсьәләләре белән шөгыльләнә. Төркемнең бурычларына компанияләргә һәм стартапларга ярдәм итү, катнашу һәм республикага ИТ-белгечләр җәлеп итү керә.