2023 елда «Татарстан почтасы»ның 32 авыл почта бүлекчәсе яңартылачак
9 июль - Россия почтасы көнендә - «Татарстан почтасы» Федераль почта элемтәсе идарәсе эшчәнлегендәге яңалыклар һәм мөһим вакыйгалар турында сөйлибез.
Бүген Татарстан Республикасы территориясендә 1111 почта бүлекчәсе эшли, шул исәптән 260 шәһәр һәм 851 авыл бүлекчәсе. 2022 елдан РФ Президенты йөкләмәсе буенча ТРда авыл почта бүлекчәләрен модернизацияләү программасы гамәлгә ашырыла. 2022 елда Столбище, Нурлат, Олы Әтнә, Шапши, Кече Чынлы һ.б. торак пунктларда 15 почта бүлекчәсе модернизацияләнде. 2023 елда модернизация программасы буенча 32 авыл почта бүлекчәсе яңартылачак.
Модернизация программасы буенча ремонтлана торган авыл почта бүлекчәләрендә сәламәтлек почмаклары җиһазландырыла, анда теләсә кайсы кунак сәламәтлекнең төп күрсәткечләрен (басым, температура, канда кислород күләме һәм башкалар) үзе тикшерә ала һәм Дәүләт хезмәтләрен онлайн-куллану нокталарын куллана ала.
2023 елның февраленнән Казанның үзәк почта бүлекчәсендә Кремль урамындагы 8 нче йортта квалификацияле электрон имза (КЭП) рәсмиләштерү мөмкинлеге бар. КЭП теләсә нинди документны онлайн имзаларга мөмкинлек бирә.
2023 елның апрелендә Казан почта логистикасы үзәге базасында Бонд складын оештыру буенча эксперимент башланды. Биредә таможня аша узмаган чит ил товарлары урнаштырыла. Шул ук вакытта салымнар һәм пошлиналар түләү бары тик чын сатылган товар өчен генә башкарыла. Сатылмаган барлык калдыкларны онлайн-ритейлер чит илләргә өстәмә чыгымнарсыз экспортлый алачак.
"Татарстан почтасы" махсус хәрби операция белән бәйле актуаль мәсьәләләрдән читтә калмый. Республиканың һәр почта элемтәсе бүлекчәсендә МХОга бушлай посылка җибәрергә мөмкин. 2023 елның маенда, проект башлангач, 350дән артык бушлай посылка җибәрелгән һәм аларның саны арта.
Почта штатында хәтта роботлар да бар. 2022 елда Иннополис шәһәрендәге почта бүлекчәсенә робот-почтальоннар «эшкә урнаштырылган». Аларның бурычы-посылканы алучыларга җиткерү.