Татарстан Республикасы 2022 елда кече һәм урта эшкуарлыкны цифрлаштыру йомгаклары буенча төбәк рейтингының ТОП-10лыгында

Россия мәгълүмат технологияләрен үстерү фонды 2022 елда кече һәм урта предприятиеләрне цифрлаштыру программасын гамәлгә ашыруга йомгак ясады һәм өч юнәлеш буенча лидер төбәкләрне атады - программа тәэминатын 50% ташлама белән сатып алган муниципаль берәмлек субъектлары саны буенча топ-10 төбәк; сатып алынган программа тәэминаты саны буенча топ-10 төбәк; РФ субъектының барлык кече һәм урта предприятиеләреннән колачлау буенча топ-10 төбәк, шулай ук популяр программа тәэминатларыТОПы.

2022 елда программаны гамәлгә ашыру нәтиҗәләре буенча Россия болытлы программа тәэминатының 600 меңнән артык лицензиясе 50% ташлама белән РФнең 85 регионыннан 215 мең кече һәм урта эшкуарлык субъекты тарафыннан сатып алынган. Программа ярдәмендә компанияләрнең керемнәре үсеше 30%ка арткан. Программада Россиянең 58 компаниясе катнашты. 1 лицензия өчен уртача чек 2975 сум тәшкил иткән.

"Россия программа тәэминатына күчү ИТ-тармакны алга таба үстерүдә төп чараларның берсе булып тора. Бу илнең генә түгел, ә һәр предприятиянең мөһим куркынычсызлык факторы. Кече һәм урта эшкуарлыкны цифрлаштыру программасы компанияләрнең ил карарларына күчүен стимуллаштырган һәм Россия компанияләрен хуплаган нәтиҗәле ярдәм чарасы булды. Бүген цифрлы продуктлар - теләсә кайсы предприятие эшчәнлегендә мөһим җиһаз, шуңа күрә бу программа һәр эшкуар өчен мөһим һәм нәтиҗәле", - дип билгеләп үтте Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министры Айрат Хәйруллин.

«Россия Федерациясенең Цифрлы икътисады» илкүләм программасының «Цифрлы технологияләр» федераль проекты кысаларында кече һәм урта бизнесны цифрлаштыруга ярдәм итү программасы эшли башлады. Программаның операторы - Россия мәгълүмат технологияләрен үстерү фонды.