Рөстәм Миңнеханов полковник-элемтәче Борис Кузнецов хөрмәтенә истәлек тактасын ачты
Бүген Казанда Советлар Союзы Герое Борис Кузнецовка багышланган мемориаль такта ачылды. Истәлек тактасы Горький ур., 3Б адресы буенча урнашкан йортта урнаштырылган, Кузнецов гомеренең соңгы елларында шунда яшәгән.
Рөстәм Миңнеханов билгеләп үткәнчә, Борис Кириллович – олы шәхси батырлык иясе, 19 яшендә Советлар Союзы Герое булган чын патриот. «Татарстан җире һәрвакытта да үз бурычларына тугры булган батыр кешеләрне дөньяга китерде. Борис Кирилловичның тормышы Ватанга тугрылык һәм мәхәббәт, һәм фидакарьлек, тиңсез батырлык һәм каһарманлык үрнәге булды. Аның язмышында бөтен илнең, аның каһарман буыны җиңүчеләренең язмышы чагылыш тапты», - диде ТР Президенты.
Борис Кузнецов сугышчы-элемтәче була. 1943 елдан артиллерия батареясында элемтә бүлегенә җитәкчелек итә. Ленинград өчен сугышта, Демянск һәм Иске Рус операцияләрендә, Курск сугышында катнаша. 1943 елның октябрендә Днепрны кичкәндә батырлыгы өчен Советлар Союзы Герое дигән югары исемгә лаек була. Анда ул командалык белән элемтәгә керә һәм 45 тапкыр өзелгән телефон линиясен торгыза, бер очракта елга аша ике тапкыр йөзеп чыга. 20 октябрьдә, командир үлгәннән соң, немецларның һөҗүмен җиңеп, командованиене үз өстенә ала.
Борис Кириллович Ершов урамы буенча 2015 елның маенда куелган сугышчы-элемтәчеләр һәйкәленең прообразы булган.