Татарстанның барлык медицина учреждениеләре бердәм телефонга тоташтырылачак
«Халык контроле» системасын модернизацияләү планнары һәм COVID-19 буенча тәүлек буе эшли торган кайнар линия эше турында бүген журналистларга Татарстанның цифрлы үсеш министры урынбасары Альберт Яковлев һәм республикада Кеше хокуклары буенча вәкаләтле вәкил Сәрия Сабурская сөйләделәр. Брифинг ТР Министрлар Кабинетында узды.
Спикерлар билгеләп үткәнчә, «Халык контроле» үзен иҗтимагый төзекләндерү мәсьәләләрен хәл итүдә халык һәм дәүләт арасындагы хезмәттәшлекнең ышанычлы каналы буларак күрсәтте.
«Бүген "Халык контроле" - татарстанлыларның иң яраткан санлы коралларының берсе. Сигез ел эчендә системага 307 меңнән артык гариза кергән, аларның 87% уңай хәл ителгән. Ул тагын да уңайлырак булсын өчен, без системаны камилләштерүне дәвам итәчәкбез», - дип ассызыклады Альберт Яковлев.
Моннан тыш, министр урынбасары Татарстанда узган атнада эшли башлаган COVID-19 мәсьәләләре буенча модернизацияләнгән кайнар линия турында сөйләде.
Контакт-үзәк тәүлек буе эшли. 50дән артык оператор һәм телефон роботы Лилия республика халкына атнага 24 сәгать 7 көн консультация бирә.
Спикер билгеләп үткәнчә, узган ял көннәрендә генә дә контакт-үзәккә 200 татарстанлы мөрәҗәгать иткән, ә линиягә барлыгы 5 600 дән артык шалтырату килгән. Шул ук вакытта уртача көтү вакыты 25 секундтан артмый, ә оператор белән сөйләшү күп очракта 4 минутка якын дәвам итә.
"Исегезгә төшерәм, контакт-үзәккә хәзер 122 номер буенча да шалтыратырга мөмкин. Якын арада без "03" һәм "112" хезмәтләренең шалтыратуларны оператив кабул итү өчен поликлиникалар белән турыдан - туры телефон элемтәсен оештырырга ниятлибез», - диде Альберт Яковлев.
Сәрия Сабурская, үз чиратында, агымдагы елның 11 аенда «Халык контроле» системасының эш нәтиҗәләре турында сөйләде.
"2020 ел башыннан системага безнең халыктан 72 меңнән артык мөрәҗәгать кергән, шуларның 55 меңгә якыны хәл ителгән инде. Шул ук вакытта бүгенге көндә республикада үтәлеш проценты 55% тан кимрәк булган бер генә район да юк", - дип билгеләп үтте ул.
Спикер шулай ук республикада булдырылган төбәк белән идарә итү үзәге өчен нәкъ менә «Халык контроле» платформа булуын да искәртте.
Бүген «Халык контроле» системасы аша татарстанлылар 64 категория буенча хәбәрнамәләр бирә алалар, аларның өчесе ноябрьдә өстәлә.
Халык арасында иң популяр категорияләр: территорияне төзекләндерү, муниципаль юлларны карап тоту һәм ремонтлау, тышкы реклама кагыйдәләрен бозу, юл хәрәкәтен оештыру, торак-коммуналь хезмәтләр һ. б.