Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгы

Дмитрий Медведев Татарстанның электрон документ әйләнеше тәҗрибәсен киң кулланырга өндәде

2012 елның 14 марты, чәршәмбе

Россия Федерациясе Президенты Дмитрий Медведев Татарстандагы дәүләт ведомстволары арасында кәгазь документлар йөртүне тыю тәҗрибәсен киң кулланырга өндәде һәм документларның кәгазьгә төшерелгән копияләрен сакларга кушкан законнарны, шул исәптән архив турындагы законны да, яңадан карарга кушты. Бу хакта ул бүген Россиядә “Ачык хөкүмәт” системасын формалаштыру эшче төркеменең киңәйтелгән утырышында әйтте. “Сколково”да үткән әлеге утырышның төп темасы дәүләт хезмәтен кадрлар белән тәэмин итү булды.

Очрашуда булачак дәүләт чиновникларын, идарәчеләрне сайлап алу критерийлары, гражданнар һәм чиновниклар арасындагы хезмәттәшлек сыйфатын яхшырту, дәүләт идарәчелеге өлкәсендә яңа технологияләр кертү мәсьәләләре каралды.

Татарстанда электрон хөкүмәт системасын кертү тәҗрибәсе белән вице-премьер - ТР Мәгълүматлаштыру һәм элемтә министры Николай Никифоров уртаклашты. Николай Никифоров “Композит” холдингы генераль директоры Леонид Меламед белән берлектә “Электрон хөкүмәт” системасын формалаштыру эшче төркемендә рәистәш булып тора.

Бүгенге дискуссия вакытында еш телгә алынган электрон документ әйләнеше системасы һәм гомумән мәгълүматлаштыру технологияләре соңгы елларда үзгәрешләр кичерде, шулай ук дәүләт һәм гражданнар арасындагы хезмәттәшлек интерфейслары үзгәрде, диде Николай Никифоров. Мисал итеп ул Татарстанда электрон сервисларның ни дәрәҗәдә кулланылуын дәлилләгән саннар китерде. Мәсәлән, узган ел республикада 23 мең пар – барлык гаризаларның 75 проценты - ЗАГСка гаризаларын электрон формада биргән. Барлыгы узган ел татарстанлылар электрон хезмәтләргә 10 миллион тапкыр мөрәҗәгать иткән. “Бу хәлне без формалашып килә торган системада һичшиксез исәпкә алырга тиеш”, диде Николай Никифоров.

Тагын бер мисал - электрон документ әйләнешен кертү. Татарстанда бик гади принцип эшли – министрлыкларда кәгазь документлар белән эш итү тыелган. Бүген 28 меңнән артык хезмәткәр, хөкүмәт әгъзаларын да кертеп, республиканың барлык дәүләт хакимияте органнарын берләштергән электрон документ әйләнеше системасында эшли. Бу системага барлык министрлыклар, ведомстволар һәм муниципалитетлар, шулай ук кайбер коммерциячел оешмалар тоташкан.

Системада барлыгы 4,5 миллион документ бар, көн саен яңа 4 мең документ теркәлә, 7 меңнән артык резолюция куела. Дәүләт хезмәткәрләре вакыты дөрес файдаланыла, документлар карау, гражданнар мөрәҗәгатьләре буенча мөһим карарлар кабул итү вакыты кыскара. Хәзер Татарстан тәҗрибәсе Мәскәү хөкүмәтендә, РФ финанслар министрлыгында һәм башка федераль ведомстволарда кертелә, бу система белән Россиянең башка регионнары да кызыксына.

Николай Никифоров сүзләренә караганда, электрон документ әйләнеше дәүләт идарәчәлегенә йогынты ясый, чөнки дәүләт хезмәткәрләре вакыты күбесенчә документлар белән эшләүгә китә.

ТР Мәгълүматлаштыру һәм элемтә министрлыгы матбугат хезмәте

БАРЛЫК ЯҢАЛЫКЛАРНЫ УКУ