Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгы

2011 ел азагына Татарстанның зур шәһәрләрендә асылмалы элемтә линияләре җир асты кабель линияләренә алыштырылачак

2011 елның 10 августы, чәршәмбе

2011 ел азагына Татарстанның зур шәһәрләре санкцияләнмәгән асылмалы элемтә линияләреннән котылачак. ТР Хөкүмәте боерыгы нигезендә Казан, Яшел Үзән, Чистай, Алабуга, Түбән Кама, Яр Чаллы шәһәрләрендә 1,8 мең километрдан артык кабель җир асты линияләренә алыштырылачак. Бу хакта бүген ТР Министрлар Кабинетында узган брифингта ТР Премьер-министры урынбасары – Мәгълүматлаштыру һәм элемтә министры Николай Никифоров сөйләде.
Аның сүзләренчә, бүген республиканың 20 шәһәрендә 2253 км асылмалы элемтә линиясе бар, шуларның 918 километры Бөгелмәдә, 335 километры Казанда, 290 километры Әлмәт шәһәрендә. “Бу саннарга йорт араларында сузылган кабельләр керми. Аларның километражын хәтта элемтә предприятиеләре дә, идарәче компанияләр дә белми”, - диде министр.

Хәзерге вакытта асылмалы линияләрне җир асты линияләренә алыштыру эшләре бара. 2011 елның алты аенда 117 км линия алыштырылды. Чагыштыру өчен – 2010 елда элемтә предпрятиеләре 113 км линия алыштырган иде.

Эшне җанландыру өчен ТР Премьер-министры урынбасары – ТР Министрлар Кабинеты Аппараты җитәкчесе Шамил Гафаров җитәкчелегендә эшче төркем оештырылды. Төркемгә муниципалитет башкарма комитеты җитәкчеләре, тикшерүче органнар вәкилләре керә. ТР Мәгълүматлаштыру һәм элемтә министрлыгы шулай ук эшче төркем булдырды. Аңа “Таттелеком” , “ТВТ”, “Телесет”, “Эр-телеком” “Вымпелком” компанияләренең техник директорлары керде. Һәр предприятиедә элемтә линияләренә инвентаризация ясала, аларны җир астына күчерү план-графиклары төзелә.

ТР Мәгълүматлаштыру һәм элемтә министрлыгы матбугат хезмәте

БАРЛЫК ЯҢАЛЫКЛАРНЫ УКУ