Татарстан Республикасы Цифрлы үсеш министрлыгы һәм «Нтех Лаб» ҖЧҖ хезмәттәшлек турында килешүне имзаладылар
Петербург халыкара икътисади форумында Татарстан Республикасы Дәүләт идарәсен цифрлы нигездә үстерү, мәгълүмат технологияләре һәм элемтә министрлыгы һәм «Нтех Лаб» ҖЧҖ хезмәттәшлек турында килешүләрне имзаладылар. Документка имзаларны ТР Цифрлы үсеш министры Айрат Хәйруллин һәм «Нтех Лаб» компаниясе генераль директоры Алексей Паламарчук куйдылар.
Компания машина күрүе нигезендә чишелешләр эшләү өлкәсендә халыкара базарда лидерларның берсе булып тора. «Ростех» корпорациясенең компанияләр төркеменә керә. Россиядә компания үз карарларын «Имин шәһәр» һәм «Имин төбәк» кебек системаларда гамәлгә ашыра. Татарстанда "Нтех Лаб» 2018 елдан бирле эшли, хезмәттәшлек куркынычсызлыкны тәэмин итү һәм видеоаналитика өлкәсендә төзелгән.
"Бүгенге көндә тиешле аналитика системасы булган видеокамералардан алынган барлык мәгълүматны саклау өчен бердәм контур булдыру мөһим. Без һәрвакыт иң яңа карарларны гамәлгә кертү белән кызыксынабыз", – дип ассызыклады ТР Рәисе Рөстәм Миңнеханов.
Берничә юнәлеш буенча хезмәттәшлек планлаштырыла. Бу икътисад һәм социаль өлкә тармакларында ЯА технологияләрен кертү, ясалма акыл технологияләрен үстерү өчен инфраструктураның уңайлылыгын арттыру, фәнни тикшеренүләр һәм эшләнмәләр буенча уртак эш. Мәгълүмати-телекоммуникация инфраструктурасын үстерү юнәлешләре, югары технологияләр өлкәсендә инновацион эшкуарлык, программа тәэминатын импортны алмаштыру буенча эш планлаштырылган. Шулай ук шәһәр мохите өчен цифрлы чишелешләрне гамәлгә кертү, иҗтимагый киңлекләрне үстерү, транспорт инфраструктурасын модернизацияләү, торак-коммуналь хуҗалык өлкәсендә төзелеш һәм хезмәт күрсәтү процессларының нәтиҗәлелеген арттыру һ. б. буенча уртак эш көтелә.