Татарстанның көньяк-көнчыгышында интернетны тизләттеләр
Азнакай районында яшәүче ике мең кеше хәзер үз җайланмаларына фото, видео һәм башка файлларны күпкә тизрәк йөкли ала. Мегафон Сәпәй, Чалпы, Урсай авылларында дүртенче буын телеком‑җиһазлар (4G) эшләтеп җибәрде, дип хәбәр итә операторның матбугат хезмәте.
Интернеттагы үзгәрешләр шунда ук онлайн активлыкның артуына тәэсир итте. Февраль аенда гына да бу торак пунктларда яшәүчеләр һәм кунаклар 7,6 ТБ дата‑трафик үткәргәннәр. Мондый күләм фильмны югары сыйфатта 3,8 мең тапкыр карарга җитәр иде. Башкалардан ешрак Урсай авылында челтәргә керәләр, монда ай саен оператор абонентына уртача 25 Гб мәгълүмат туры килә.
Тиз интернеттан шулай ук районның төп истәлекле урыны – ЧатырТауга юл буенча туристлар файдалана ала. Чалпы Татарстанның иң биек ноктасыннан өч километр ераклыкта гына урнашкан.
"Татарстанда өч меңнән артык кече торак пункт бар, һәм без аларның һәрберсендә тотрыклы сигнал тәэмин итүне планлы рәвештә алып барабыз. Бу кешеләрнең тормыш сыйфатын яхшыртырга һәм белем, эш һәм аралашу өчен яңа мөмкинлекләр булдырырга мөмкинлек бирәчәк. Инфраструктура төзелгәннән соң, Азнакай районы авылларында мобиль интернетның тизлеге 80-100 Мбит/с җитә. Элегрәк ерак авылларга көчсез элемтә сигналы гына барып җитә иде", - дип хәбәр итте Татарстанда Мегафон директоры Михаил Русинов.