Социаль салым ташламаларын алу процедурасы гадиләштерелгән

Күп кенә гражданнарның дәвалау, уку йортларыннан белешмәләр җыю һәм декларацияләрне тутыру өчен вакыт җитми. Шуңа бәйле рәвештә, 2024 елда социаль салым ташламаларын алу процедурасы гадиләштерелгән, 2024 елның 1 гыйнварыннан дәвалау, укыту, иминият һәм фитнес чыгымнарын раслаучы хезмәтләр өчен түләү турында унификацияләнгән белешмәләр кертелгән. Чыгымнарның һәр төренә үз белешмәсе каралган, чыгымнарны раслау өчен башка документлар бирергә кирәкми.

Белешмәләр физик затның ирекле формадагы гаризасы нигезендә бирелә. Моннан тыш, салым түләүченең гаризасы буенча оешмага һәм шәхси эшкуарга хезмәтләр өчен түләүгә белешмәләрне электрон рәвештә салым органына тапшырырга вәкаләт бирергә мөмкин. 2024 елда электрон рәвештә килгән һәм контрольдә тотылган мәгълүматлар буенча, салым органы социаль салым ташламаларын алу өчен алдан тутырылган гариза төзиячәк һәм аны 2025 елда салым түләүченең шәхси кабинетына урнаштырачак.

Шулай итеп, киләсе 2025 елдан 2024 ел чыгымнары буенча 3-НДФЛ формасы буенча декларация бирмичә, гадиләштерелгән тәртиптә социаль салым ташламаларын алырга мөмкин булачак.

2023 ел чыгымнары буенча социаль салым ташламаларын алу өчен агымдагы 2024 елда салым инспекциясенә раслаучы документларның тулы комплекты белән 3-НДФЛ декларациясен җибәрергә кирәк. Моны "Физик затлар өчен салым түләүченең шәхси кабинеты" аша эшләү уңайлырак.