Татарстан мәктәп укучылары VK-ның «Цифрлы дәресендә» мессенджер технологияләрен үзләштерәчәк

Татарстанда VK-ның «Цифрлы дәресе» Бөтенроссия белем бирү проектының яңа этабы уза. 31 октябрьдә 12:00 сәгатьтә «Яңа чакырулар – цифрлы икътисад өчен кадрлар әзерләү» форумы кысаларында Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министры Айрат Хәйруллин, Учи.ру платформасы кураторы Артем Алексеев һәм VK һөнәри юнәлеш бирү һәм мәгърифәтчелек проектлары җитәкчесе Алена Штабина катнашында «Мессенджерлар» темасына ачык дәрес узачак. Дәресне трансляцияләүне ВКонтактеда «Цифрлы дәрес» җәмгыятендә һәркем карый ала.

16 октябрьдән 12 ноябрьгә кадәр илебезнең мәктәп укучылары Сферум VK-мессенджерында уку профиле мисалында аралашу өчен сервислар төзелеше һәм мөмкинлекләре, шулай ук мессенджерлар булдыруда һәм үстерүдә катнашкан IT-һөнәрләр белән танышалар.

Интерактив тренажерлар ярдәмендә 1-11 сыйныф укучылары мобиль эшләүчеләр, дизайнерлар, продакт һәм комьюнити-менеджерлар ролен сынап карый ала. Балалар цифрлы этикет кагыйдәләре һәм контент модерациясенең ничек оештырылуы һәм мессенджерда җәмгыятьләрнең ничек барлыкка килүе һәм ничек саклануы белән танышалар. Укучылар үз ботларын җыя һәм көйли алалар, шулай ук мәктәп чатлары өчен стикерпаклар ясый алалар.

VK-ның «Цифрлы дәресе» һәм аның интерактив тренажерларын өйдә әти-әниләр яки дуслар белән кулланырга мөмкин. Укытучылар шулай ук дәрестә яки класс сәгатендә «Мессенджерлар» темасына дәрес үткәрә алалар. Моның өчен VK педагоглар өчен материаллар әзерли һәм сыйныфларның төрле дәрәҗәдәге техник җиһазларына яраклаштыра.

Проектка теләсә кайсы җайланмадан кушылырга мөмкин: моның өчен «Цифрлы дәрес» сайтында VK дәресен сайларга һәм яшькә карап катлаулылык дәрәҗәсен сайларга кирәк: 1-4, 5-8, 9-11 сыйныфлар.