Кәрәзле элемтә баганалары: уйдырма яки чын куркынычмы?
Кәрәзле элемтә баганалары мәгълүмат һәм сигналлар тапшыру өчен кирәк. Алар тавыш шалтыратуларын, текст хәбәрләрен һәм мәгълүматны абонент җайланмалары һәм тышкы дөнья арасында тапшыруны тәэмин итә, безгә һәрвакыт элемтәдә булырга ярдәм итә.
Татарстан Республикасы Дәүләт идарәсен цифрлы нигездә үстерү, мәгълүмат технологияләре һәм элемтә министрлыгы бәяләвенчә, агымдагы елда инфраструктура үсешенә мобиль элемтә операторларының инвестицияләр күләме узган ел дәрәҗәсендә булачак - 2 млрд сумнан артып китәчәк. Хезмәтләрнең сыйфатын тәэмин итү өчен элемтә операторлары бер көнгә дә эштән туктамый. Әйтик, агымдагы елның беренче яртыеллыгында Татарстанда 914 база станциясе урнаштырылган һәм модернизацияләнгән. Бу эштән тыш, Татарстанда цифрлы тигезсезлекне бетерү федераль проекты гамәлгә ашырыла – Ростелеком һәм Теле2 компанияләре 100дән 500гә кадәр кеше яшәгән авыл торак пунктларын мобиль элемтә һәм интернет белән тәэмин итә. Узган ел аларның 38е беренче тапкыр мобиль интернеттан файдалану мөмкинлеген алды, 2023 елда база станцияләреТатарстанның 77 торак пунктында урнаштырылачак. 2024 елга план - тагын 87 торак пунктта база станцияләрен урнаштыру.
Кәрәзле элемтә баганасын торак йорт янында урнаштырырга мөмкинме?
База станциясен урнаштыру өчен элемтә операторына Роспотребнадзор һәм Роскомнадзордан багананы төзү өчен рөхсәт алырга кирәк. База станцияләрен урнаштыру регламентында багана тирәсендәге санитар-күзәтү зонасы 25 метрдан да ким булмаска тиеш, моңа 3 метр читләшү зонасын өстәргә кирәк, дип әйтелә.
Әгәр багана йорт түбәсендә төзелә икән, иң якын бинага кадәр ара, станциянең нурланыш куәтенә бәйле рәвештә, 10-25 метрдан ким булмаска тиеш. Түбә өслегеннән биеклек 1,55 метр дәрәҗәсендә булырга тиеш, бу очракта түбәгә чит кешеләрнең керүе тыела.
Әгәр дә бу кагыйдәләр үтәлсә, халык үз сәламәтлеге өчен борчылырга тиеш түгел.
Кәрәзле телефонлы балалар үткәргән вакытны чикләргә кирәкме?
Баланың үз кесә телефоны/смартфоны булу аңа үзен мөстәкыйль хис итәргә мөмкинлек бирә. Ләкин экран вакытын, табиблар һәм психологлар фикеренчә, чикләргә кирәк.
Россиядә кеше булган урында электромагнит нурланышның рөхсәт ителгән чик дәрәҗәсе буенча дөньяда иң катгый нормаларның берсе гамәлдә - 10 мкВт/см2.
Әгәр дә сезнең якындагы база станциясеннән электромагнит нурланыш турында борчылуларыгыз булса, Роспотребнадзор белгечләре үлчәүләр үткәрә ала.