Бәшир Рәмиев исемендәге ИТ-паркта Радио һәм элемтә көненә багышланган фестиваль узды
Чараның рәсми өлешендә Бәшир Рәмиев исемендәге ИТ-паркның конференц-залында радио һәм элемтә тармагының мактаулы хезмәткәрләрен ведомство бүләкләре белән бүләкләү узды.
Төп фестиваль мәйданчыклары ИТ-паркның 1 катындагы холлда һәм эчке ишегалдында булды. «Таттелеком» ААҖ, Татарстан Республикасы радиотелевизион тапшыру үзәге, Россия радио яратучылар берлеге музейларыннан тармак үсеше тарихына багышланган күчмә экспозицияләр эшләде. Шулай ук күргәзмә зонасында Тесла катушкасының эшен күрсәтүче интерактивлар, Казан мәгълүмат технологияләре һәм элемтә техникумы, А.Н.Туполев исемендәге Казан милли тикшеренү техник университеты һәм «Теле 2» элемтә операторы әзерләгән лабиринттагы ярышлар тәкъдим ителде.
Шулай ук Россия Почтасының посткроссинг пункты эшләде, аннан фестиваль кунаклары Россиянең теләсә кайсы почмагына нейросеть ясаган дизайнлы открыткалар җибәрделәр.
Махсус яшь кунаклар өчен ясалма интеллект ярдәмендә картиналар ясау, робототехника, чыбыксыз энергия тапшыру, фонограф, квадрокоптерлар һәм башкалар булган Балалар ИТ-паркының мастер-классларында катнашу мөмкинлеге булды.
Эчке ишегалды сәхнәсендә КНИТУ-КАИ һәм КФУ белгечләре радио, радиоастрономия һәм пилотсыз очу аппаратларының барлыкка килү тарихына багышланган фәнни-популяр лекцияләр үткәрделәр.
Төп активлыкларның берсе «Миллениум» радиосының һәм «Татар радиосы» ның туры эфиры булды. «Миллениум» радиосының туры эфирында тыңлаучыларның цифрлаштыруның йогынтысы турындагы сорауларына Татарстан цифрлы үсеш министрының беренче урынбасары Илья Начвин, «ИТ-парк» ДАУ директоры урынбасары Ләлә Бикчәнтәева, Казан мәгълүмат технологияләре һәм элемтә техникумы директоры Юрий Багров җавап бирде.
Чараның барлык мәйданчыкларында 1500дән артык кеше катнашты. Радио һәм элемтә көнен бәйрәм итү уңаеннан фестиваль республиканың Цифрлы үсеш министрлыгы тарафыннан икенче ел рәттән үткәрелә, ведомство һәм ИТ-парк өчен яхшы традициягә әверелә.