Татарстанда VK видеотехнологияләрдән «Цифрлы дәрес» бөтенроссия проекты эшли башлады
21 ноябрьдән 18 декабрьгә кадәр Россия мәктәпләрендә «Цифрлы дәрес» бөтенроссия белем бирү проектының яңа этабы уза, аның кысаларында VK компаниясе ачык дәресләр сериясендә укучыларга заманча видеотехнологияләр турында сөйли. Акцияне оештыручылар - «Цифрлы икътисад» АКБО, Россия Цифрлы үсеш министрлыгы, Россия Мәгариф министрлыгы, шулай ук Россиянең әйдәп баручы технологик компанияләре.
Бүген «Адымнар-Казан» ДАУ мәктәбендә проектны гамәлгә ашыру кысаларында Татарстан Республикасы Дәүләт идарәсен цифрлы нигездә үстерү, мәгълүмат технологияләре һәм элемтә министры урынбасары Рөстәм Һидиятуллин һәм VK мәктәп һәм яшьләр проектларын үстерү директоры Сергей Марданов мәктәп укучылары өчен дәрес үткәрделәр.
Цифрлы үсеш министры урынбасары Рөстәм Һидиятуллин билгеләп үткәнчә, Татарстанның 200 меңнән артык укучысы бөтенроссия мәгариф проектында катнашкан. «2022 елда ТР Президенты Рөстәм Миңнеханов Указы белән игълан ителгән Цифрлаштыру елы кысаларында ай саен төрле яшьтәге мәктәп укучылары өчен «Цифрлы дәресләр» үткәрелә. Информатика һәм цифрлы технологияләр белән кызыксынуны көчәйтергә һәм сакларга кирәк», - дип ассызыклады ул.
«Хәзерге укучылар өчен видеоконтент-күңел ачу ысулы гына түгел, ә файдалы белем алу мөмкинлеге дә. Бу көз VK балаларны видеотехнологияләр һәм аларны булдыру һәм үстерү белән шөгыльләнүче һөнәрләр белән таныштыра. Без «IT-белем көне» акциясе вакытында видеотехнологияләр турында сөйли башладык, анда укучылар һәм аларның укытучылары IT-тармакның әйдәп баручы экспертлары белән аралаштылар. Хәзер без балаларны «Цифрлы дәресе» проекты кысаларында видеотехнологияләр дөньясына тирәнтен чумдыруны дәвам итәбез», — дип билгеләп үтте VK мәктәп һәм яшьләр проектларын үстерү директоры Сергей Марданов.