Ел башыннан "Халык контроле" системасына 24 меңгә якын мөрәҗәгать килде
Агымдагы елның дүрт аенда республикада яшәүчеләр «Халык контроле» системасына 24 меңгә якын гариза тапшырган.
«Халык контроле» системасы Татарстан территориясендә 2012 елдан бирле эшли. Аның мөмкинлекләре аркасында гражданнар һәм Дәүләт торак-коммуналь хуҗалык, сәламәтлек саклау, төзекләндерү һ. б. өлкәләрдәге мәсьәләләрне хәл итү өчен нәтиҗәле хезмәттәшлек итә ала.
2020 елның беренче дүрт аенда системага 24 меңгә якын мөрәҗәгать кергән, шуларның 15 870е уңай хәл ителгән, бу барлык гаризаларның 67%ын тәшкил итә. Моннан тыш, күрсәтелгән чорда 16 953 комментарий һәм 12 500 бәя алынган.
Шунысын да билгеләп үтәргә кирәк, язгы айларда татарстанлылар аеруча актив булган: март аенда – 9 272 мөрәҗәгать; апрель аенда - 9 029 мөрәҗәгать.
Шул ук вакытта, татарстанлыларны барыннан да бигрәк территорияләрне төзекләндерү (100 гариза), муниципаль юлларны карап тоту һәм ремонтлау (4 586 гариза), тышкы рекламаны бозу (1 687 гариза) һәм юл хәрәкәтен оештыру (1 276 гариза) белән бәйле мәсьәләләр борчыган.
Исегезгә төшерәбез, Республикада яшәүче һәр кеше «Халык контроле» системасында гариза калдыра ала. Моның өчен ТР Дәүләт хезмәтләре порталында авторизация һәм килеп туган проблеманың төгәл тасвирламасы гына кирәк булачак. Татарстанлыларга уңайлы булсын өчен шулай ук «ТР Халык контроле» мобиль кушымтасы эшләнгән, аны App Store һәм Play маркеттан алырга мөмкин.