Айрат Хәйруллин: «Нәтиҗәле ведомствоара бәйләнешне булдырырга кирәк»
Бүген, 6 май көнне, Татарстан Республикасы дәүләт идарәсенең Цифрлы үсеш, мәгълүмати технологияләр һәм элемтә министрлыгы каршындагы архитектура советының чираттагы утырышы узды. Очрашу видеоконференция режимында үтте.
Архитектура Советы киңәшмәсенең төп темалары "Цифрлы КФҮ" проекты һәм электрон документ әйләнеше системасы. Совет әгъзалары аларны модернизацияләүнең мөмкин вариантлары һәм моның өчен кирәкле ресурслар турында фикер алыштылар.
Очрашу барышында Татарстан Республикасы Финанслар министрлыгы башлыгы Айрат Хәйруллин, барлык муниципалитетлар һәм Дәүләт органнарын үз эченә алырга тиешле нәтиҗәле ведомствоара бәйләнешне булдырырга кирәк, дип билгеләп үтте. Ул шулай ук КФҮ аша цифрлаштыру мөһим мәсьәлә булып калуын ассызыклады. Шуны да билгеләп үтәргә кирәк, агымдагы елда Татарстан Республикасы Цифрлы үсеш министрлыгы, Цифрлы трансформация үзәге, хакимият органнары һәм муниципалитетлар белән берлектә, «Цифрлы икътисад» илкүләм проекты кысаларында, өстәмә рәвештә 105 дәүләт һәм муниципаль хезмәт һәм 43 хезмәтне электрон рәвешкә күчерү эшен алып барачак. Шулай ук Архитектура советы кысаларында электрон документ әйләнеше системасында процессларны автоматлаштыру буенча төп алымнар каралды.
Исегезгә төшерәбез, архитектура Советы Татарстан Республикасында цифрлаштыру процессларын нәтиҗәле идарә итү һәм республика халкы өчен яңа цифрлы сервислар булдыру өчен оештырылган иде. Аңа IT-тармакның алдынгы компанияләре, шулай ук республиканың төрле ведомстволары җитәкчеләре керде: ICL, БАРС Груп, Таттелеком, InnoSTage, Ак Барс Банк, мәгълүмати проектлар белән идарә итү, «Юл хәрәкәте иминлеге» ДБУ, мәгълүмати технологияләр үзәге һәм цифрлы трансформация үзәге. Совет рәисе итеп ТР Дәүләт идарәсенең Цифрлы үсеш, мәгълүмати технологияләр һәм элемтә министры Айрат Хәйруллин билгеләнде.