«Иннополис» махсус икътисадый зонасының өченче мәйданчыгы барлыкка киләчәк - Казанда
"Иннополис" махсус икътисадый зонасы һәм ICL компанияләре төркеме МИЗның өченче мәйданчыгын булдыру буенча проект әзерлиләр. Тагын бер технопарк Казанда төзеләчәк дип планлаштырыла. Әлегә эшләү стадиясендә булган проект нигезендә, 19 катлы технопаркның мәйданы якынча 16 мең кв.метр тәшкил итәчәк һәм 1,5 меңгә кадәр кешене урнаштырачак.
ICL компанияләре төркеме - "Иннополис" МИЗның эре партнеры. Компания милкендә офис биналары һәм Лаеш районы мәйданчыгында җитештерү корпусы бар. Хәзерге вакытта «Иннополис» МИЗда ICL компанияләре төркеменнән 3 компания уңышлы эшләп килә.
"Без ICL компанияләре төркеме белән хезмәттәшлекнең дәвам итүенә бик шат, - дип билгеләп үтте «Иннополис» МИЗ генераль директоры Ренат Хәлимов. - Инвестор булган Казандагы Технопарк - кирәкле проект, ул дәүләт-шәхси партнерлыкның тагын бер уңышлы үрнәге булачак. Шулай ук Казанда «Иннополис» МИЗ мәйданчыгы булу безнең башкаладан әлеге технопаркта урнашкан компанияләргә махсус икътисадый зона ташламаларыннан файдаланырга мөмкинлек бирәчәк».
ICL Директорлар советы рәисе Виктор Дьячков сүзләренә караганда, яңа проект шәһәр һәм МИЗ өчен өстәмә мөмкинлекләр ачачак һәм инновацион идеяләрне үстерү һәм гамәлгә ашыру өчен менә дигән мәйданчык булачак.
Белешмә:
"Иннополис" МИЗ бүген - Татарстан Республикасының Югары Ослан һәм Лаеш муниципаль районнары территорияләрендә 2 мәйданчык, гомуми мәйданы 311,43 га тәшкил итә, бу югары технологияле һәм цифрлы индустрияләрдән 80 резидент һәм 11 партнер, алар 2500 дән артык эш урыны булдырган һәм Татарстан Республикасы һәм Россия Федерациясе икътисадына 8 млрд.сумнан артык инвестицияләгән.
ICL - Россиянең иң эре ИТ-компанияләре исемлегенә керүче компанияләр төркеме, ул ИТ-хезмәтләрнең, проектларның, карарларның һәм продуктларның бөтен спектрын тәкъдим итә. Штаб-фатир Казанда урнашкан, Мәскәү, Санкт - Петербург, Воронеж, Әстерхан, Иннополис һәм Белградта (Сербия) кайбер вәкиллек һәм офислар бар. 2018 елда компанияләр төркеме буенча гамәлгә ашыру күләме 9,85 млрд. сумны тәшкил итте, хезмәткәрләр саны - 3000 дән артык кеше.