"Халык контроле" сервисы ярдәмендә Татарстан студентлары законсыз чүплекләр белән көрәшә
Республиканың югары һәм урта махсус уку йортлары студентлары ТР Экология һәм табигый байлыклар министрлыгының рөхсәтсез калдыклар ташлау урыннары турында хәбәр итү акциясендә катнаша ала. 31 нче майга кадәр чүплекләр турында иң күп хәбәрләр җибәргән катнашучылар призлар белән бүләкләнәчәк. Хәбәрләр ТР Дәүләт хезмәтләре Порталы һәм «ТР Халык контроле» мобиль кушымтасы аша кабул ителә.
Акциядә катнашу өчен түбәндәге шартларны үтәргә кирәк:
- uslugi.tatarstan.ru порталында теркәлергә ;
- сез студент булган вуз яки ссузны алдан күрсәтеп, калдыклар урнаштыру өчен билгеләнмәгән территориядә чүплекләр турында хәбәр итү сервисы аша җибәрергә. Фотоматериал белән проблеманы тасвирлауны һәм геолокацион урынны төгәл күрсәтеп барырга кирәк.
Шунысы МӨҺИМ: акциядә катнашуга бары тик «Чүплек» категориясе буенча гына гаризалар кабул ителә.
Нәтиҗәләр июнь башында ТР Экология һәм табигый байлыклар министрлыгы тарафыннан ясалачак. Бүләкләү «Экояз2019» конкурсына «Иң актив студент» һәм «Иң актив вуз» номинацияләрендә йомгак ясау кысаларында узачак.
Акция турында тулырак мәгълүмат белән Татарстан Республикасы Экология һәм табигый байлыклар министрлыгы сайтында танышырга мөмкин.