Чаллы ИТ-паркында сәнәгатьне цифрлаштыру буенча семинар узды
Бүген Яр Чаллы ИТ-паркында җитештерүне цифрлаштыру буенча Татарстан Республикасы Президенты Рөстәм Миңнеханов катнашында гамәли семинар узды. Чарада шулай ук «Ренова-Холдинг Рус» ҖЧҖне стратегик планлаштыру һәм үстерү директоры Олег Фомичев, Татарстан Республикасы Премьер-министры урынбасары - Татарстан Республикасы Мәгълүматлаштыру һәм элемтә министры Роман Шәйхетдинов, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов һәм башкалар катнашты.
Цифрлы технологияләрнең көчле үсеше бүген эшчәнлекнең барлык өлкәләренә сизелерлек йогынты ясый. Икътисадның реаль секторын эшләү һәм цифрлы технологияләрне гамәлгә кертү максатында Татарстан Россиянең алдынгы цифрлаштыру үзәкләре һәм глобаль компанияләр белән хезмәттәшлек итә, - дип билгеләп үтте семинарда Рөстәм Миңнеханов. Шул ук вакытта Татарстан Президенты республика предприятиеләренең цифрлаштыру процессларына аз катнашуын билгеләп үтте. Экспертлар бәяләгәнчә, Татарстанның өчтән бере генә цифрлы күчеш юнәлешләрен билгеләгән.
Мәгариф һәм эшкә урнашу системасы җитди фикерләүне таләп итә. Кыска вакыт эчендә безнең алдынгы югары уку йортлары базасында "Цифрлы икътисад" юнәлеше буенча яңа программалар эшләтеп җибәрелергә тиеш. Төп бурыч - ИТ-белем бирүнең сыйфатын күтәрү һәм аның агымдагы тенденцияләргә туры килүе.
Семинарда шулай ук 5G яңа буын челтәрен гамәлгә кертү уңышлы цифрлаштыру шартларының берсе булып тора, дип билгеләп үтелде. Давостагы форумда яңгыраган экспертлар фаразларына караганда, 5G челтәрен эшләтеп җибәрү яңа технологик укладка күчүне тизләтәчәк. 2018 елның августыннан башлап мондый челтәрне пилотлаштыру Иннополиста һәм Казанда башланды. Әлеге технологияләрне куллану предприятиеләргә гамәлдәге технологияләрне модернизацияләргә, шулай ук яңа производстволар булдырырга мөмкинлек бирәчәк.
Фото: Михаил Фролов