Роман Шәйхетдинов РФ Хөкүмәтендә узган киңәшмәдә 5G зонасын булдыру буенча Татарстан тәҗрибәсе турында сөйләде
Бүген Россия Федерациясе Хөкүмәте каршындагы Аналитик үзәктә "Россия Федерациясендә 5G элемтә челтәрен булдыру һәм үстерү перспективалары турында" түгәрәк өстәл узды. Профильле ведомстволар вәкилләре, региональ хакимиятләр, операторлар һәм экспертлар 5G челтәрен җәелдерү модельләре, уңыш факторлары һәм ил өчен актуаль халыкара тәҗрибә турында фикер алыштылар.
Чараның төп спикерлары - Россия Федерациясе Хөкүмәте Рәисе урынбасары Максим Акимов, Россия Федерациясе Элемтә һәм массакүләм коммуникацияләр санлы үсеш министры Константин Носков, Аналитик үзәк җитәкчесе Владислав Онищенко. Төбәктә 5G зонасын булдыру тәҗрибәсе белән Татарстан Республикасы Премьер-министры урынбасары – Мәгълүматлаштыру һәм элемтә министры Роман Шәйхетдинов уртаклашты.
Министр Татарстанда элемтә тармагы актив үсеш кичерүдән башлады: 2018 елда гына да 2 793 яңа база станциясе файдалануга тапшырылды (аларның гомуми саны 17 меңгә җитте), шул ук вакытта LTE стандартының база станцияләре саны 53% ка артты һәм, нәтиҗә буларак, файдаланылучы Интернет-трафик 59% ка артты. Бүген республика торак пунктларының 30% ы Интернеттан югары тизлектә файдалану һәм әлеге технологияләрне икътисадның сәнәгать тармакларында куллану мөмкинлеге бирә торган LTE стандарты белән колачланган.
Россия 5G яңа стандартына ешлыклар бүлеп бирү буенча актив эш итүче алдынгы илләр арасына керде, һәм Татарстан 5G челтәрен Яр Чаллы, Әлмәт һәм Арчада җәелдерү планлаштырыла, ә Казанда һәм Иннополиста алар 2018 елда ук эшләтеп җибәрелде. Шуңа бәйле рәвештә республикада интернет әйберләр һәм виртуаль чынбарлык технологияләре өлкәсендә 5G челтәрен гамәли куллану буенча гамәлгә ашырылган эш кейслары бар инде, алар өчен мәгълүматларны тапшыру тизлеге һәм ышанычлылыгы мөһим.
Роман Шәйхетдинов сәнәгать секторы мөмкинлекләрен киңәйтү өчен кирәк-яраклар интернетын үстерүнең мөһимлеген ассызыклады, һәм әлеге технология пилотсыз транспорт өлкәсендәге проектларны тормышка ашырганда киң куллану табачагына ышаныч белдерде. Исегезгә төшерәбез, Татарстанда пилотсыз автомобильләр «КАМАЗ» һәм «Яндекс» компанияләре тарафыннан инде узган елдан бирле тестлана.