Роман Шәйхетдинов Татарстан элемтә тармагы хезмәткәрләрен бүләкләде
Кичә Татарстанда телефон элемтәсе оешуга 130 ел тулуга багышланган тантаналы чара кысаларында Татарстан Республикасы Премьер-министры урынбасары – Мәгълүматлаштыру һәм элемтә министры Роман Шәйхетдинов тармакның иң күренекле хезмәткәрләренә бүләкләр тапшырды.
«ТР Мәгълүматлаштыру һәм элемтә өлкәсендәге казанышлары өчен» күкрәк билгесе белән ДАҺБУ «Төбәкара компетенцияләр үзәге – Казан Мәгълүмати технологияләр һәм элемтә техникумы» директоры Юрий Багров, тармак ветераны, 1989-1992 елларда ТАССР Җитештерү-техник элемтә идарәсе башлыгы урынбасары, 1994-2010 елларда ТР буенча Россвязьнадзор җитәкчесе Әнвәр Вәлиев, АҖ «Мобиль дәүләт элемтәсе» директоры Александр Леонтьев һәм ҖАҖ «Таттелеком» генераль директоры Лотфулла Шәфигуллин бүләкләнде.
Шулай ук тармак предприятиеләренең кайбер хезмәткәрләренә ТР Мәгълүматлаштыру һәм элемтә министрлыгының Мактау грамоталары тапшырылды.
Роман Шәйхетдинов, тантаналы чара кунакларына мөрәҗәгать итеп, элемтә үсеше Татарстан Республикасы Мәгълүматлаштыру һәм элемтә министрлыгының төп бурычы булып кала, дип ассызыклады. "Интернет челтәренә керү һәм кәрәзле элемтә үтеп керү дәрәҗәсе буенча Татарстан Россия төбәкләре арасында алдынгы урында тора, әмма алда яңа бурычлар тора – бу тест май аенда Иннополиста җибәрелгән бишенче буын элемтә челтәрен үстерү, көндәлек тормышка «интернет - әйберләр», «акыллы йорт» кебек технологияләрне кертү, пилотсыз автомобильләр кертү», - диде министр. Ул элемтәчеләргә Татарстанның цифрлы тигезсезлек бетерелгән беренче төбәк булуы, «250+» программасы гамәлгә ашырылганы өчен рәхмәт белдерде. Хәзерге вакытта цифрлы икътисад программасы төзелә, аның кысаларында 100 кешедән торган барлык торак пунктлар да җепселле-оптик элемтә линияләренә тоташтырылачак - ә бу Татарстан территориясендә тагын 700 дән артык авыл.
Чыгышының ахырында Роман Шәйхетдинов тармак үсешенең тотрыклылыгы нигезен югары дәрәҗәдәге профессионаллар тәшкил итүен, республиканың күп кенә элемтәчеләре булуын билгеләп үтте һәм хезмәттәшләренә көндәлек хезмәттә уңышлар теләде.