Казанда DigitalSkills мәгълүмати технологияләр өлкәсендә икенче тармак чемпионаты узачак
2018 елның 12-16 нчы декабрендә «Казан Экспо» Халыкара күргәзмә үзәге территориясендә DigitalSkills-2018 Мәгълүмати технологияләр өлкәсендә WorldSkills стандартлары буенча II тармак чемпионаты узачак. Яшь ИТ-белгечләр 26 компетенция буенча һөнәри осталыкта ярышачак, алар арасында блоклы – технологияләр кулланып карарлар эшләү, роботлаштырылган эретеп ябыштыру, сити-фермерлык, квант технологияләре, интернет әйберләр һәм башкалар бар.
Чемпионатта 17-28 яшьлек конкурсантлар - Урта һөнәри яки югары белем бирү укучылары, шулай ук ИТ-сектор компанияләре хезмәткәрләре катнашачак. Быел чемпионатта яшүсмер кызлар да (14-16 яшь) мобиль кушымталарны эшләү, машина белән укыту һәм зур мәгълүматлар, Челтәр һәм системалы идарә итү һ.б. компетенцияләрендә катнаша алачак. Катнашучыларны алдан сайлап алу мәктәпләрдә онлайн-тест форматында уза.
Узган елдагы кебек үк, DigitalSkills ярышлар мәйданчыгы гына түгел, цифрлы икътисадта кадрлар һәм белем бирү мәсьәләләре турында фикер алышачак коммуникация мәйданчыгы да булачак. Чемпионат кысаларында индустрия лидерлары белән эксперт сессияләре, белем бирү треклары, интерактив стендлар һәм try a skill зоналары форматындагы һөнәри юнәлеш бирү активлыгы узачак. Партнер һәм Чемпионатта катнашучылар арасында республиканың эре компанияләре – Татнефть, Таттелеком, шулай ук Россия һәм халыкара - Ростелеком, Infowatch, Яндекс, Кибер Россия, Россия квант үзәге, Fanuc, Cisco һәм башкалар бар. Барлыгы 200 дән артык конкурсант һәм 200 дән артык эксперт катнашыр дип көтелә.
Чемпионатны оештыручылар - Россия Федерациясе Цифрлы үсеш, элемтә һәм массакүләм коммуникацияләр министрлыгы, Татарстан Республикасы Хөкүмәте һәм "Яшь профессионаллар (Ворлдскиллс Россия)" берлеге.
«Саннар» тормышның төп өлкәләренә үтеп керүгә, ИТ-белгечләрне кадрлар белән әзерләү мәсьәләсе зур әһәмияткә ия, - дип билгеләп үтте ТР Премьер-министры урынбасары – Мәгълүматлаштыру һәм элемтә министры Роман Шәйхетдинов. - WorldSkills стандартлары буенча һөнәри осталык ярышлары "цифрлы" күнекмәләрне үстерергә ярдәм итә, алар бүген иң мөһиме була».
Мәгълүмати технологияләр өлкәсендә WorldSkills стандартлары буенча DigitalSkills — 28 яшькә кадәрге яшь катнашучылар – тармакның кече, урта һәм эре бизнес предприятиеләре хезмәткәрләре, шулай ук илнең цифрлы икътисадын кадрлар белән тәэмин итү мәсьәләләрен хәл итү максатында урта һәм югары һөнәри белем бирү студентлары арасында үткәрелә торган чемпионат. Беренче шундый чемпионат узган елда Иннополиста узды. Анда 120 конкурсант үзара 15 компетенция буенча көч сынашты. Чемпионатта катнашучылар 23 алтын, 9 көмеш һәм 8 бронза медаль яуладылар. Татарстан вәкилләре ИТ-чемпионатта ун призлы урын алдылар.
Фото: «Яшь профессионаллар (Ворлдскиллс Россия)»