Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгы

2011 елның 15 сентябре, пәнҗешәмбе

Бүген Казанның “Ривьера” кунакханә-күңел ачу комплексында “Электрон мәктәп-2011” I Халыкара конференциясе ачылды. Ул ТР Мәгълүматлаштыру һәм элемтә министрлыгы химаясында ТР Мәгариф һәм фән министрлыгы белән “Интел” корпорациясе тарафыннан оештырылды.

Конференциянең пленар утырышында Татарстан Президенты Рөстәм Миңнеханов, РФ Дәүләт Думасы беренче вице-спикеры Олег Морозов, ТР Премьер-министры урынбасары – ТР Мәгълүматлаштыру һәм элемтә министры Николай Никифоров, ТР Мәгариф һәм фән министры Альберт Гыйльметдинов, «Интел» корпорациясе вице-президенты Джон Дэйвис, «КАМАЗ» ААҖ гендиректоры Сергей Когогин катнашты.

Конференциядә барлыгы 300дән артык кеше катнашты, алар арасында - Россиянең 35 төбәгеннән мәгариф һәм мәгълүматлаштыру идарәсе органнары вәкилләре, шулай ук 11 чит илдән - бу өлкә белгечләре.

ТР Президенты Рөстәм Миңнеханов сәламләү чыгышында, фикер алышуга куелган мәсьәлә барыбыз өчен дә мөһим, дип ассызыклады. “Көндәшлелеккә сәләтлелек мәгариф дәрәҗәсеннән тора. Әлеге мәйданчык бу өлкәдәге эшләнмәләрне җыеп күрсәтергә мөмкинлек бирәчәк”, - диде республика башлыгы. Аның сүзләренә караганда, мәгариф зур инвестицияләр таләп итә, әмма ул аңа лаек.
“Безнең бурыч җиһаз алып эшләтү генә түгел, аның файда китерүе мөһим. Без мәктәп һәм укытучыдан башладык, чираттагы максат – киләчәктә безнең таләпләргә туры килерлек укучы”, - дип белдерде Р.Миңнеханов. Ул “Интел” компаниясенә ярдәм өчен рәхмәт белдерде һәм мондый конференцияләр ел саен булачак, дип билгеләп үтте.

“Дөньяның нинди булачагы мәктәпкә бәйле, - дип белдерде РФ Дәүләт Думасы беренче вице-спикеры Олег Морозов. – Бу барлык илләргә дә кагыла, ә кыю бурычлар куючы Россия өчен икеләтә мөһим”. Бу өлкәдә Татарстан лидерлар рәтендә, дип билгеләп үтте ул. “Лидер булу һәм Россия буенча кертелә торган электрон технологияләр белән горурланырлык булсын өчен барысын да эшләгез”, - диде О.Морозов.

«Интел» корпорациясе вице-президенты Джон Дэйвис Татарстан мәктәпләренең иң заманча техника белән җиһазлануы миңа зур тәэсир итте, дип белдерде. “Бу мәсьәлә турында министр белән фикер алышканда, мин республикада нинди зур эш башкарылуы турында күп кешеләр белергә тиеш, дип әйттем. Шуңа күрә бу конференцияне оештырган өчен зур рәхмәтлемен”, - диде Джон Дейвис.

ТР Премьер-министры урынбасары – ТР мәгълүматлаштыру һәм элемтә министры Николай Никифоров сүзләренә караганда, бүген бөтен Россия электрон рәвештә дәүләт, муниципаль һәм башка социаль хезмәтләр күрсәтүгә күчү белән шөгыльләнә. Аның фикеренчә, болар барысы да база инфраструктурасын үстерүгә нигезләнгән булырга тиеш. Август аена Татарстанда 1 миллион электрон хезмәт күрсәтү факты теркәлгән. “Бу саннар Россия халкының электрон сервиска ни дәрәҗәдә ихтыяҗлы булуын күрсәтә. Мәктәпне үзгәртергә телибез икән, без үзебез яңа реалияләргә һәм заман таләпләренә туры килергә тиешбез ”,- диде Николай Никифоров. Ул шулай ук Татарстан хөкүмәте мәктәп укытучыларына 45 мең ноутбук тапшыруын искәртеп китте. Бүгенгә укучыларның 36 проценты, ата-аналарның 12 проценты даими рәвештә “Электрон дәүләт” порталын карап бара.

Татарстанда барлык дәрәҗәдә дә мәгариф инфраструктурасы көчле, дип белдерде ТР Мәгариф һәм фән министры Альберт Гыйльметдинов. Аның мәгълүматларына караганда, Татарстанда 1 миллионга якын кеше мәгариф системасы эчендә кайный. Россиядә Мәскәү белән Санкт-Петербургтан кала бер генә шәһәр дә мондый мәгариф потенциалына ия түгел.

Чара кысаларында “Электрон мәктәп-2011” күргәзмәсе ачылды.
ТР “Информацион технологияләр үзәге” башкарма директоры Татьяна Камалетдинова пресс-конференциядә Татарстанның 200 укучыдан да ким булмаган мәктәпләрендә WI-Fi бар, диде. Хәзер Татарстанда “Электрон мәгариф” бердәм системасы аша хакимият һәм мәгариф органнары көн саен челтәрнең кулланышын тикшерә алалар. Бу- укучының Интернет челтәрен уңышлы куллануын тәэмин итү өстендә эшләргә зур ярдәм. Т.Камалетдинова шулай ук, электрон дәреслекләр кертү мәсьәләсенә тукталып, дәреслекләрне электрон рәвештә басарга әле нәшриятләр әзер түгел, дип искәртте.Татарстанда 53 мәктәп “электрон мәктәп” статусы алган. Аларда “Бер укучы - Бер компьютер” проекты тормышка аша. Бу мәктәпләрнең һәрбер кабинетында мобиль класслар һәм интерактив кулланмалар бар. “Болар барысы да безнең киләчәгебез. Шунысы мөһим, мондый заманча җиһазлар белән эшләүче укытучы көчле укытучы була, һәм без педагогларны көчле укыту контенты белән тәэмин итәбез”, - дип ассызыклады А.Гыйльметдинов.

Конференция кысаларында “Электрон мәктәп-2011” күргәзмәсе ачылды, анда кадрлар әзерләү, дистанцион укыту һәм инфраструктура бүлекләре бар.

Конференция программасына укыту процессына мәгълүмати технологияләр кулланучы мәктәпләргә бару кергән.

Конференция программасында шулай ук уку процессында мәгълүмат технологияләрен куллану моделе уңышлы кертелгән республика мәктәпләрендә булу каралган.

“Татар-информ” материалларыннан

БАРЛЫК ЯҢАЛЫКЛАРНЫ УКУ

Бүген Казанда “Электрон мәктәп-2011” халыкара конференциясе ачылды