Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгы

Россия Эчке эшләр министры ИТ-парк Бизнес-инкубаторы резидентлары проектлары белән кызыксынды

2011 елның 10 августы, чәршәмбе

Бүген Татарстанга эш визиты белән килгән Россия Федерациясе Эчке эшләр министры Рәшит Нургалиев югары технологияләр өлкәсендәге «IT-парк» технопаркында булды. РФ Эчке эшләр министрын Татарстан Президенты Рөстәм Миңнеханов озатып йөрде. Вице-премьер – ТР Мәгълүматлаштыру һәм элемтә министры Николай Никифоров Рәшит Нургалиевка IT-парк инфтраструктурасы, резидентлар турында сөйләде. Россия Эчке эшләр министры Бизнес-инкубаторда гамәлгә ашырыла торган проектлар белән танышты, аларга зур бәя бирде. “Эффективно.рф” компаниясенең “Хезмәткәрләр компетенциясен тестлау” проектын караганда, Рәшит Нургалиев чит илләрдә моңа охшаш системаларны куллану аларның эффектлы икәнен күрсәтә, диде. Ул шулай ук Татарстан буенча Эчке эшләр министрлыгының үзәк аппаратын бу методика ярдәмендә тикшерергә тәкъдим итте.

Татарстан Президенты Рөстәм Миңнеханов Рәшит Нургалиевның игътибарын РФ Финанс министрлыгының юл хәрәкәте кагыйдәләрен бозган өчен җыелган штрафларны федераль бюджетка җибәрүгә бәйле инициативасына юнәлтте. Республика башлыгы бу очракта юл хәрәкәте иминлеге программаларын финанслау чыганакларының югалачагына, кайбер төбәкләрдә, шул исәптән Татарстанда булдырылган юл йөрү кагыйдәләрен бозу очракларын видеотеркәү системасының юкка чыгу ихтималына карата борчылуын белдерде. “Башка илләр тәҗрибәсендә, без кагыйдә бозучылардан җыйган акчалар юл хәрәкәте иминлеген тәэмин итүгә юнәлдерелергә тиеш”, - дип саный Р.Миңнеханов.

Рәшит Нургалиев Татарстан Республикасы электрон документлар әйләнеше системасындагы яңалыклар белән танышты. Рөстәм Миңнеханов билгеләп үткәнчә, документлар әйләнешендә кулланылучы мәгълүматны саклау алымнары Федераль иминлек хезмәте тарафыннан сертификатлаштырылган.

РФ Эчке эшләр министрына шулай ук Татарстан Республикасы ашыгыч оператив хезмәтләренең эшен координацияләү буенча «ГЛОНАСС+112» системасы тәкъдим ителде.

БАРЛЫК ЯҢАЛЫКЛАРНЫ УКУ