Иннополис Университетында студентларның икенче чыгарылышы булды
Бүген Иннополис университеты киңкүләм төстә “беренче карлыгачлар”ын чыгарды – биредә бакалавр һәм магистрларга диплом тапшыру тантанасы узды. Чарада Россиянең элемтә һәм массакүләм коммуникацияләр министры Николай Никифоров, Татарстан Республикасы Президенты вазифаларын вакытлыча башкаручы Рөстәм Миңнеханов, ТР Премьер-министры урынбасары – ТР мәгълүматлаштыру һәм элемтә министры Роман Шәйхетдинов, Иннополис университеты ректоры Александр Тормасов катнашты. Бүген 21 бакалавр һәм 17 магистр мәгълүмати технологияләр өлкәсендә дипломнар алды.
Николай Никифоров яшь белгечләрне сәламләп: “Бүген истәлекле көн – бу Иннополис университеты бакалаврлары һәм магистрларының беренче олы чыгарылышы. Иннополис университетының киләчәктә кызыклы проектлар һәм иң кыю хыяллар чынга аша торган мәйдан булуын телим. Бүгенге нәтиҗәләрегездән канәгатьбез, бүген бәйсез экспертлар эшләрегезгә бәя биреп, тулаем алганда, университетның эшчәнлегенә күзәтү ясады. Университет чын мәгънәсендә үз исемен дәлилләде – бүген аның чыгарылыш белгечләре бар”, - диде. Министр бүген шушы тантана алдыннан махсус икътисади зонаның күзәтчелек советы үткәнен һәм анда беренче биш проект хупланганын билгеләп узды. “Сезнең өчен бу потенциаль эш урыны дигән сүз, бу компанияләр Россиядә IT өлкәсендә иң заманча эшләнмәләр булдырып, экспорт өчен дә әзерләячәк”, - диде Николай Никифоров.
“Мин сезнең белән бергә сөенәм”, - дип мөрәҗәгать итте Рөстәм Миңнеханов. Ул уникаль университет булдыру идеясенең үз-үзен аклаганын, бу бурычның реаль булуын ассызыклады.
“Без үз алдыбызга җитди бурыч куйдык: бу университетның тышкы кыяфәте, эчтәлеге, биредә эшләүче профессорларыннан да күренә. Сайлап алу вакытында булачак студентларга да югары таләпләр куелган дип ышанам. Әлегә сез - 40, киләчәктә 8 тапкыр артуыгыз көтелә, чөнки мондый белгечләргә илдә ихтыяҗ зур, - дип билгеләп үтте Татарстан лидеры. Ул яшь белгечләргә Иннополисның үз проектларын тормышка ашыру мәйданы булуын теләде. - Бу мәйданчык белем бирү генә түгел, ә эре тикшеренү үзәге дә булыр дип уйлыйм. Мәгълүмати технологияләр – алдынгы юнәлеш, сезнең барлык башлангыч эшләрегезгә ярдәм итәрбез”, - дип өметләндерде Рөстәм Миңнеханов.
Ректор Александр Тормасов быелгы чыгарылышның икенчесе булуын искәртеп үтте: вузның беренче белгечләре былтыр чыгарылган.
2015-2016 уку елында Иннополис университетында 350 бакалавр һәм магистр белем ала башлаячак.
Бакалаврларның берсе Яр Чаллыдан Дамир Мирзануров “Татар-информ” мәгълүмат агентлыгы хәбәрчеләре белән аралашты. “Бер ел укыган бакалавларның сынау төркеме булды. Без Иннополис университетына бакалавриатның соңгы курсында күчтек. Безнең белгечлек – Computer Science. Моңа кадәр Казан илкүләм тикшеренү-техник университетында (КАИ) “Мәгълүмати куркынычсызлык, мәгълүматлаштыру объектларын комплекслы яклау” белгечлеге буенча белем алдым”, - дип сөйләде дипломлы белгеч. Дамир Иннополис университетында дәресләрнең инглиз телендә баруын, өметләре аклануын, чит илләрдән мөгаллимнәрнең, чыннан да, югары таләпләр куюын билгеләп узды. Алга таба Дамир укуын дәвам иттерергә тели – ул магистратурага кергән.