ИТ-парк резидентларыннан керем 6 млрд сумнан арткан
Бүген ТР Премьер-министры урынбасары – мәгълүматлаштыру һәм элемтә министры Роман Шәйхетдинов Татарстанның Министрлар Кабинетында узган брифингта технопарклар әһәмиятен әнә шулай бәяләп үтте. Роман Шәйхетдинов ассызыклап узганча, югары технологияләр өлкәсендәге IT-паркка әлегә ил күләмендә дә тиңнәр юк. IT-паркның Казандагы мәйданы 30 мең кв м дан артык, Яр Чаллыда ул 29 мең кв м га якын. “Алар икесе дә федераль үзәктән паритетлы, ягъни бертигез дәрәҗәдә финанслау программасы нигезендә сафка бастырылды. РФ Элемтә һәм гаммәви коммуникацияләр министрлыгы химаясе астында тормышка ашырыла торган бу программа Россиядә быел төгәлләнәчәк. Ул илнең берничә төбәгендә гамәлгә кертелде. Шушы программа кысаларында сафка бастырылган Россия күләмендәге 7 технопаркның иң уңышлы икесе – Татарстанда. Алар - “Идея” технопаркы һәм IT-парк”, - дип белдерде Роман Шәйхетдинов.
Роман Шәйхетдинов алга таба бизнес-инкубаторлар турында сөйләде. Былтыр аларга 7 сайлап алу процедурасы оештырылган. Россия һәм якын чит илләрдән 500 дән артык заявка кабул ителгән. Россиянең 14 шәһәре һәм төбәгеннән 70 тән артык претендент резидент статусын алган. “3 мең кв метр мәйданга ия бизнес-инкубатор Россиядә иң эреләрдән санала. Аның 2 мең кв метры – Яр Чаллыда, 1 мең кв м – Казанда”, - дип хәбәр итте министр. Аның сүзләренә караганда, проектларның "яшәү озынлыгы" 60 процентка кадәр арткан. Чит ил резидентлары өчен 6 фатир бирелгән. Бизнес-инкубаторның 4 резиденты IT-резидентларга әверелеп, үзләре IT-паркта билгеле бер мәйдан арендалый башлаган.
Министр билгеләп үткәнчә, Казандагы IT-лицейга Татарстан районнарыннан килүче балалар саны артуы – сөенечле күренеш. “IT-лицей белән берлектә мәктәп бизнес-инкубаторын эшләтеп җибәрү буенча эш алып барыла, анда укучылар үзләрен шәхси проектларын тормышка ашыру буенча сынап карый алачак”, - диде Роман Шәйхетдинов.