Беренче киберспортив турнир «КиберЦифровиада» Татарстанда үткәрелде
2025 елның 22 февралендә Cyber Park Arena базасында (Б.Рәмиев исемендәге ИТ-парк ) Татарстан Республикасы ИТ-компанияләре хезмәткәрләре өчен махсус оештырылган «КиберЦифровиада» уникаль киберспортив турниры узды. Чара профессионалларны һәм киберспортны сөючеләрне берләштерде, виртуаль ярышлар дөньясында күркәм вакыйгага әверелде.
«КиберЦифровиада» катнашучыларга Counter-Strike 2, Танклар дөньясы, Dota 2 һәм EA SPORTS FC 25 кебек команда һәм индивидуаль дисциплиналардан торган ярыш программасын тәкъдим итте. Турнирда катнашучылар үзләренең осталыкларын күрсәттеләр, ә тамашачылар чын спорт бәйрәме атмосферасыннан ләззәт алдылар.
"Турнир спорт һәм технологияләрне берләштерүнең ачык үрнәге, ул белгечләрнең алдынгы чишелешләрне эшләп кенә калмыйча, күренекле спорт сәләтләрен дә күрсәтә алуын күрсәтте. Ышанам ки, вакыйга мондый турнирларны уздыру өчен яңа офыклар ача һәм Татарстанның цифрлы технологияләр һәм киберспорт өлкәсендә лидер буларак позициясен ныгыта", - дип билгеләде Татарстан Республикасының дәүләт идарәсен цифрлы нигездә үстерү, мәгълүмат технологияләре һәм элемтә министры Айрат Хәйруллин.
Чараны Татарстан Республикасы Дәүләт цифрлы нигездә үстерү, мәгълүмат технологияләре һәм элемтә министлыгы, «ИТ-парк» югары технологияләр өлкәсендәге технопарк һәм Cyber Park Arena оештырды. Турнир партнерлары — "Папа Джонс" һәм "Мир Танков".