«Цифрлы дәрес» нең яңа сезоны укучыларны икътисад тармакларында ясалма интеллект технологияләрен куллану белән таныштырачак

18 сентябрьдән 8 октябрьгә кадәр яңа сезонда икътисад тармакларында ясалма интеллект технологияләрен куллану буенча беренче «Цифрлы дәрес» узачак, аның стратегик партнеры һәм эчтәлеген эшләүчесе - Сбербанкның «Киләчәккә өлеш» хәйрия фонды. «Цифрлы икътисад дәресе» бөтенроссия белем бирү акциясе - ул ел саен «Цифрлы икътисад» АНО, РФ Цифрлы үсеш, элемтә һәм массакүләм коммуникацияләр министрлыгы һәм Мәгариф министрлыгы белән берлектә «Цифрлы икътисад өчен кадрлар» федераль проектына ярдәм итү өчен үткәрелә торган чара.

«Узган ел «Цифрлы дәрес»тә 15,4 миллионнан артык кеше катнашты. Бу проект тарихында иң зур күрсәткеч. Без быел да шундый ук югары нәтиҗәләргә ирешербез, ә балалар яңа белем һәм уникаль күнекмәләр алырлар дип өметләнәбез», – диде Россия Цифрлы үсеш министрлыгының Цифрлы компетенцияләрне үстерү һәм мәгариф департаменты директоры Татьяна Трубникова.

AI Journey 2022 ясалма интеллект буенча халыкара конференциядә Россия Президенты Владимир Путин ясалма интеллект өлкәсендәге иң актуаль технологик юнәлешләрне һәм карарларны икътисадның төп тармакларында куллану өчен кирәклеген билгеләде: сәнәгать, төзелеш, транспорт, авыл хуҗалыгы, сәламәтлек саклау һәм башкалар. Нәкъ менә бу тема яңа сезон өчен сайланган да.