Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгы

Татарстанда яшәүчеләр 90 төр дәүләт хезмәтләре электрон рәвештә ала ала

2011 елның 29 декабре, пәнҗешәмбе

2011 елда Татарстанда дәүләт һәм муниципаль хезмәтләр электрон формада 10 млн тапкыр күрсәтелгән. Әлеге мәгълүмат бүген ТР Министрлар Кабинетында Премьер-министр Илдар Халиков рәислегендә узган киңәшмәдә яңгырады. Ул дәүләт хезмәтләрен электрон юл белән күрсәтү мәсьәләләренә багышланган иде.

Илдар Халиков агымдагы елны дәүләт хезмәтләрен электрон юл белән күрсәтүдә министрлыклар һәм ведомстволар өчен алга китеш елы булды дип саный. “Халыкка электрон юл белән күрсәтелә торган хезмәтләр берничә тапкырга, кайбер очракларда дистәләрчә тапкырга артты. Бу, үз чиратында, татарстанлыларның яшәү сыйфатын күтәрү ысулы”, -дип билгеләп үтте ул.

Премьер-министр яңгыраткан мәгълүматларга караганда, быел электрон юл белән хезмәтләр күрсәтүгә 7 млн га якын запрос ясалган, 390 млн сумнан артык 1,2 млн түләү башкарылган. 2 млн граждан приемга электрон юл белән язылган. 2011 елда дәүләт һәм муниципаль хезмәтләрне электрон юл белән күрсәтүнең барлыгы 10 млн факты теркәлгән. ТР Дәүләт һәм муниципаль хезмәтләр порталында 25 млн нан артык сәхифәне караган 1,2 млн уникаль кулланучы теркәлгән.

Илдар Халиков сүзләренә караганда, яхшы нәтиҗәләр белән генә канәгатьләнмичә, электрон формадагы дәүләт хезмәтләрен кулланылышка кертүне алга таба активлаштырырга кирәк. Кайбер төр хезмәтләр буенча кирәкле күрсәткечләргә ирешелеп, кайберләрендә яхшы динамика күзәтелә. Шул ук вакытта һәр министрлык-ведомство, муниципалитетның хезмәтләрнең кимендә 50 процентын электрон юл белән күрсәтүенә ирешү өчен эшләргә кирәк.

ТР Хөкүмәте башлыгы муниципаль хезмәтләр күрсәтүнең электрон системасын кертү буенча актив эш алып барган муниципалитет башлыкларына рәхмәт белдерде. Илдар Халиков сүзләренә караганда, күпчелек төр электрон хезмәтләр шәһәргә караганда авыл җирләре өчен мөһимрәк тә әле.

ТР Премьер-министры урынбасары-мәгълүматлаштыру һәм элемтә министры Николай Никифоров декабрь аенда республикада 86 хезмәтнең электрон юл белән күрсәтелүен хәбәр итеп, аларның 56 процентының ТР буенча Эчке эшләр министрлыгы өлешенә, аның сизелерлек өлешенең ЮХИДИ штрафларын түләүгә туры килүен искәртте. Күрсәтелгән электрон хезмәтләрнең 17 проценты ТР Мәгълүматлаштыру һәм элемтә министрлыгы, 12 проценты – ТР Сәламәтлек саклау министрлыгы өлешенә туры килә.

Министр сүзләренә караганда, 2011 елда халык арасында популярлык казанган электрон хезмәтләр – Интернет аша балалар бакчаларына язылу, ЗАГСка гариза бирү булган.

ТР Премьер-министры Илдар Халиков дәүләт һәм муниципаль хезмәтләр өчен түләүләрне кабул итүдә файдаланучы системалар һәм банклар арасында конкурентлык булдырырга кирәк, дигән фикердә.

Аның сүзләренә караганда, 4-5 түләү системасының гамәлдә булуы, кабул ителә торган түләүләр өчен комиссияне киметергә юл ача һәм электрон формадагы хезмәтләрнең уңайлыгын арттырачак.

ТР Президенты матбугат хезмәте

БАРЛЫК ЯҢАЛЫКЛАРНЫ УКУ