Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгы

“ИТ-парк” югары технологияләр өлкәсендәге технопарк бизнес-инкубаторында тагын өч стартап резидент статусы алды

2011 елның 9 июне, пәнҗешәмбе

Бүген “ИT-парк” югары технологияләр өлкәсендәге технопарк бизнес-инкубаторына өч яңа резидент өстәлде. Алдагы көндә ИТ-паркта икенче тапкыр стартап-проектлар конкурсы узды. Анда егерме яшь ИТ-компания үзләренең проектларын экспертларга тәкъдим итте.

Экспертлар төркеменә ИТ-бизнес вәкилләре – «Softline» компаниясенең инвестицияләр буенча директоры Елена Алексеева, аның урынбасары Владимир Тарханов, “СОО of Uvenco Holding” җитәкчесе, “Ritzio Group” директоры, “Runa Capital” җитәкче партнеры Дмитрий Чихачев, “Greenfield-Project” компаниясе җитәкчесе Ренат Гарипов, шулай ук ТР Премьер-министр урынбасары – Мәгълүматлаштыру һәм элемтә министры Николай Никифоров һәм “ИТ-парк” югары технологияләр өлкәсендәге технопарк директоры Динар Насыров керә.

Тәкъдим ителгән проектларны анализлаганнан соң, экспертлар 5 стартапны алдагы турга сайлап алды, шулай итеп “Альфа-мед”, “StartPack”, “Живые книги”, “Appointments” һәм “Reactive” проектлары җентекләп презентацияләнү мөмкинлеге алды. Презентациядән соң яңадан иң кызыклы өч проект сайланып алынды, һәм алар Бизнес-инкубатор резидентлары статусы алачак : “Альфа-мед”, “Живые книги”, “Appointments” .

Алдан хәбәр ителгәнчә, яңа резидентларга тулаем җиһазландырылган 6 эш урыны бирелә. Бизнес-инкубаторның үзәкләштерелгән секретариаты бар, монда шулай ук бухгалтерлык, юридик, консультация, проект-менеджмент хезмәте һәм башка хезмәтләр күрсәтелә.

ИТ-паркның бизнес-инкубаторында бер команда тоту проект өстендә эшләүнең беренче елында айга 6 мең сумга төшә. Команда бизнес-инкубаторда иң күбе 3 ел эшли ала.

ТР Мәгълүматлаштыру һәм элемтә министрлыгы матбугат хезмәте

БАРЛЫК ЯҢАЛЫКЛАРНЫ УКУ