Роман Шәйхетдинов IOI-2016 чарасына әзерләнү буенча киңәшмә уздырды
Бүген ТР Мәгълүматлаштыру һәм элемтә министрлыгында информатика буенча халыкара олимпиадага әзерләнү буенча киңәшмә узды. Биредә Казан Федераль Университеты, Иннополис Университеты, ТР Мәгариф һәм фән министрылыгы вәкилләре катнашты. Ел саен үтә торган, 28 еллык тарихы булган ярыш Россиядә беренче тапкыр үткәрелә. Олимпиаданы үткәрү хокукына ия булу өчен Казан Япония һәм Әзербайҗан илләрендәге шәһәрләр белән ярышкан.
Казанда үтәчәк олимпиадада катнашу өчен 84 илдән 327 укучы теркәлгән. Һәр илдән дүрт укучы һәм ике җитәкчедән торган команда катнаша. Россиядән ике команда булачак.
Олимпиада программасы компьютерда башкарыла торган өч алгоритмик бирем кергән ике турдан тора. Һәр биремне чишү өчен алгоритмнарны һәм мәгълүматлар структурасын эшләргә, программаларны эшләргә һәм сынап карарга кирәк булачак.
Информатика буенча XXVIII Халыкара олимпиадада җиңүчеләр катнашучылар рейтингы буенча беренчеләр арасыннан билгеләнәчәк. Алтын медальгә ия булучылар дөньядагы барлык илләр тарафыннан информатика буенча иң яхшы яшь белгечләр дип танылачаклар.
Бәйге программасыннан тыш, укучылар өчен экскурсияләр, танып-белү чаралары, шулай ук олимпиаданы тантаналы ачу һәм ябу кичәсе оештырылачак. Мәктәп укучылары Универсиада авылы территориясендә яшәячәкләр һәм ярышачаклар, дип хәбәр итә ТР Мәгълүматлаштыру һәм элемтә министрлыгы матбугат хезмәте.
Казанда олимпиаданы оештыручы төп оешмалар арасында – Казан федераль университеты, Иннополис университеты, РФ Массакүләм мәгълүматлаштыру һәм элемтә министрлыгы, РФ Мәгариф һәм фән министрлыгы, ТР Мәгълүматлаштыру һәм элемтә министрлыгы, ТР Мәгариф һәм фән министрлыгы.
Исегезгә төшерәбез, 2014 елның 2-нче апрелендә Россия Федерациясе Хөкүмәте тарафыннан 2016 елның 12-19 август көннәрендә Казан федераль университетында информатика буенча халыкара олимпиада үткәрү турында 507-р номерлы карар кабул ителгән иде.