Иннополиста Бөтенроссия робот техникасы олимпиадасының йомгаклау этабы ачылды
Иннополиста Бөтенроссия робот техникасы олимпиадасының финалы ачылды. Искәртәбез: аның темасы булып калдыкларга каршы көрәш.
Ачылыш тантанасында Россия элемтә һәм массакүләм коммуникацияләр министры Николай Никифоров, Россия мәгариф һәм фән министры урынбасары Вениамин Каганов, ТР Премьер-министры урынбасары - мәгълүматлаштыру һәм элемтә министры Роман Шәйхетдинов, ТР вице-премьеры - мәгариф һәм фән министры Энгель Фәттахов, Иннополис университеты ректоры Александр Тормасов катнашты.
Бөтендөнья роботлар олимпиадасының Бөтенроссия этабы өченче ел рәттән Иннополиста уза, дип билгеләп үтте Россия элемтә һәм массакүләм коммуникацияләр министры Николай Никифоров.
"Дәүләт Иннополис шәһәрен төзеп, сезнең кебек яшь белгечләр өчен шартлар булдыру бурычын куйган иде, - дип белдерде федераль министр. - Сезнең бирегә килүегез үк инде җиңү".
"Иннополис сез яшәячәк шәһәр булырга мөмкин. Шуңа игътибар итегез", - дип өстәде ТР мәгълүматлаштыру һәм элемтә министры Роман Шәйхетдинов.