Татарстанда почта хезмәтләрен модернизацияләүнең яңа этабы: Россия почтасы белән килешү имзаланды
Татарстан Рәисе Рөстәм Миңнеханов «Россия Почтасы» АҖ генераль директоры Михаил Волков белән очрашты. Очрашу «Казан Экспо»да «РОСТКИ» Россия-Кытай хезмәттәшлегенең III форумы кырларында узды. Очрашуда Татарстан Республикасы цифрлы үсеш министры Айрат Хәйруллин катнашты. Очрашуда Татарстан Хөкүмәте белән «Россия Почтасы» АҖ арасында Хезмәттәшлек турында килешү имзаланды.
Почта хезмәтләрен модернизацияләү Татарстан Республикасы Рәисе Рөстәм Миңнеханов ярдәме белән гамәлгә ашырыла һәм почта хезмәтләрен күрсәтүнең сыйфатын яхшыртуга юнәлдерелгән, бигрәк тә авыл җирлегендә.Алдагы елларга планлаштырыла:
- 2025 елда 15 почта элемтәсе бүлекчәләрен модернизацияләү;
- 2025-2030 елларда Россия Почтасы милкендәге 196 бүлекчәгә этаплап ремонт ясау;
- Республика муниципалитетлары милкендәге 198 бүлекчәне ремонтлау мәсьәләсен карау.
Очрашуда традицион матбугат басмаларын саклау турында фикер алыштылар. Ел саен язылу күләме 6-7% ка кими, татар, чуаш һәм удмурт телләрендә милли газета-журналларны саклау мәсьәләсе аеруча кискен тора. Хәзер Татарстанда 634 072 нөсхәгә язылу теркәлә.
Тагын бер эш юнәлеше - авылда почта хезмәте хезмәткәрләрен социаль яклау. 2024 елда Татарстан Почтасының 2394 хезмәткәре республика бюджетыннан 42,6 миллион сум күләмендә өстәмә түләү алды. Россия Почтасының генераль директоры Михаил Волков 2025 елда 2340 хезмәткәр өчен мондый субсидияне кабатлау мөмкинлеген карауны сорады.
Почта хезмәтләрен цифрлаштыруга аерым игътибар бирелде. Килешү почта сервисларына заманча мәгълүмат технологияләрен гамәлгә кертүне күздә тота, бу республиканы цифрлы трансформацияләү максатларына туры килә.
«Республика Рәисе ярдәме һәм Россия Почтасы белән нәтиҗәле эшләү нигезендә без халыкка почта хезмәтләрен сыйфатлы күрсәтү өчен уңайлы шартлар булдырачакбыз», — дип ассызыклады цифрлы үсеш министры Айрат Хәйруллин.
Килешүне имзалау республика халкы өчен, бигрәк тә ерак торак пунктлардагы, сыйфатлы почта хезмәтләреннән файдалану мөмкинлеген арттыруда җитди адым булачак.