Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгы

Сингапур компанияләрен ИТ-авыл үсешенә җәлеп итү Татарстан мәнфәгатьләренә туры килә

2011 елның 13 сентябре, сишәмбе

Татарстан Республикасы Сингапур компанияләре белән хезмәттәшлек итүгә әзер. Бу турыда бүген ТР Премьер-министры урынбасары - Мәгълүматлаштыру һәм элемтә министры Николай Никифоров Мәскәүдә Россия-Сингапур хөкүмәтара комиссиясенең икенче утырышында әйтте. Комиссия утырышын Россия Хөкүмәте Рәисе урынбасары –Хөкүмәт Аппараты җитәкчесе Вячеслав Володин алып барды.

Аерым алганда, Татарстан Сингапурның Ascendas компаниясен республикада төзелүче IT-авыл (IT-village) үсешенә һәм идарәчелегенә җәлеп итү күздә тотыла.

IT-авыл Казан үзәгеннән 35 чакрым ераклыкта урнашыр, аның территориясе якынча 1200 гектар тәшкил итәр дип көтелә. Проект тарафыннан IT-белгечләр өчен уңайлы торак төзү буенча махсус программа, социаль инфраструктура булдыру каралган. Анда 20 мең белгеч, ә гаиләләрен дә исәпкә алсаң, 50 мең кеше яшәргә тиеш. Николай Никифоров әйтүенчә, “Яшә, укы, эшлә, ял ит” (Live, Learn, Work & Play) проектының төп нигезен Сингапур тәҗрибәсе тәшкил итә. “Иң яхшы яшәеш сыйфаты, иң яхшы мохит булдырганда гына без конкурентка сәләтле була алабыз. Шулай булганда гына без иң яхшы белгечләрне, иң яхшы компанияләрне җәлеп итә алабыз. Бу проектның уңышлыгы алшарты”, - диде ул.
Сингапур компанияләре белән хезмәттәшлек итү IT-village проектына Россиядә генә түгел, глобаль дөнья базарында да конкурентлык итәргә мөмкинлек бирәчәк, дигән ышаныч белдерде Николай Никифоров.

Ул шулай ук 2007 елда Ли Куан Ю әфәнденең “Алабуга” махсус экономик зонасына визиты турында искәртеп узды. “ Сингапур тәҗрибәсеннән чыгып эш итү “Алабуга” зонасының икътисадый үсеш ноктасына әверелүенә сәбәп булды. Бүген мәгълүмати технологияләр өлкәсендә эшләүче компанияләр өчен яңа шундый үсеш ноктасы булдыруның олы потенциалын күрәбез”,-дип әйтте ул.

ТР Мәгълүматлаштыру һәм элемтә министрлыгы матбугат хезмәте

БАРЛЫК ЯҢАЛЫКЛАРНЫ УКУ